ઓસ્ટ્રેલિયા અને બાંગ્લાદેશ વચ્ચે રમાઈ રહેલી પ્રથમ ટેસ્ટ મેચમાં બાંગ્લાદેશના ઝડપી બોલર તસ્કીન અહમદે શાનદાર બોલિંગ સાથે પોતાના અનોખા સેલિબ્રેશનથી પણ બધાનું ધ્યાન ખેંચ્યું છે. કેમરોન ગ્રીનને આઉટ કર્યા બાદ તસ્કીને જે રીતે ઉજવણી કરી તેનો વીડિયો સોશિયલ મીડિયા પર ઝડપથી વાયરલ થઈ રહ્યો છે.
ડાર્વિનના મરારા ક્રિકેટ ગ્રાઉન્ડ પર રમાઈ રહેલી બે ટેસ્ટ મેચની સિરીઝની પ્રથમ મેચમાં ઓસ્ટ્રેલિયાએ ટોસ જીતીને પ્રથમ બેટિંગ કરવાનો નિર્ણય લીધો હતો. જોકે બાંગ્લાદેશના ઝડપી બોલરોએ શરૂઆતથી જ ઓસ્ટ્રેલિયન બેટિંગને મુશ્કેલીમાં મૂકી દીધી હતી. તસ્કીન અહમદે પણ મહત્વપૂર્ણ વિકેટ મેળવી ટીમને મજબૂતી આપી.
22મી ઓવરની શરૂઆતની બોલ પર કેમરોન ગ્રીને તસ્કીન સામે છગ્ગો ફટકાર્યો હતો. પરંતુ ઓવરની છેલ્લી બોલ પર ગ્રીને ફ્લિક કરવાનો પ્રયાસ કર્યો અને બોલ મિડ-વિકેટ તરફ ગયો. ત્યાં મુશફિકુર રહીમે ડાઇવ લગાવીને શાનદાર કેચ પકડી લીધો. આ સાથે ગ્રીનની ઇનિંગ્સ માત્ર 13 રને સમાપ્ત થઈ ગઈ.
વિકેટ મળ્યા બાદ તસ્કીન અહમદે પોતાની જીભ બહાર કાઢી અને બંને હાથ હવામાં ઊંચા કરીને ડાન્સ કરતા હોય તેવી રીતે ઉજવણી કરી. તેની આ મસ્તીભરી ઉજવણી કેમેરામાં કેદ થઈ અને ત્યારબાદ તેનો વીડિયો સોશિયલ મીડિયા પર વાયરલ થયો.
આ મેચ બાંગ્લાદેશ માટે ખાસ છે, કારણ કે ટીમ લગભગ 23 વર્ષ બાદ ઓસ્ટ્રેલિયામાં ટેસ્ટ મેચ રમી રહી છે. શરૂઆતના સેશનમાં બાંગ્લાદેશના પેસ એટેકે જોરદાર પ્રદર્શન કરતાં ઓસ્ટ્રેલિયાને 74 રનમાં જ ચાર વિકેટ ગુમાવવી પડી હતી.
તસ્કીનના આ વિકેટે માત્ર ઓસ્ટ્રેલિયા પર દબાણ વધાર્યું નહીં, પરંતુ તેમની અનોખી ઉજવણીને કારણે મેચની બહાર પણ ચર્ચા જગાવી છે.
Taskin Ahmed with one of the all-time celebrations after nabbing Cam Green 😂 #PlayoftheDay | @nrmainsurance | #AUSvBAN pic.twitter.com/VF8dHRGJNB
— cricket.com.au (@cricketcomau) August 13, 2026