ઇન્ડિયન પ્રીમિયર લીગ Indian Premier League 2026માં મેદાન પર મોટા સ્કોર અને છગ્ગા-ચોગ્ગાની વરસાદ વચ્ચે પણ તેની લોકપ્રિયતા અંગે ચિંતા વધતી જોવા મળી રહી છે. તાજેતરના આંકડાઓ સૂચવે છે કે લીગની વ્યૂઅરશિપ અને બ્રાન્ડ વેલ્યુમાં નોંધપાત્ર ઘટાડો નોંધાયો છે, જે ભવિષ્ય માટે ચેતવણી સમાન માનવામાં આવી રહ્યો છે.
રિપોર્ટ મુજબ, ટીવી પર IPLની વ્યૂઅરશિપ રેટિંગમાં લગભગ 18.8 ટકા ઘટાડો થયો છે. 2025માં 4.5% રહેલું લિનિયર ટીવી શેર 2026માં ઘટીને 3.71% થયું છે. સરેરાશ વ્યૂઅરશિપમાં પણ 26% નો ઘટાડો નોંધાયો છે, જ્યાં દર્શકોની સંખ્યા 10.6 મિલિયનથી ઘટીને 7.84 મિલિયન થઈ ગઈ છે. કુલ રીચમાં પણ 8.3% ઘટાડો જોવા મળ્યો છે.
જાહેરાત ક્ષેત્રમાં પણ મોટો ઝટકો લાગ્યો છે. IPL સાથે જોડાયેલા બ્રાન્ડ્સની સંખ્યા 31% ઘટી છે—2025માં 65થી વધુ બ્રાન્ડ્સ હતા, જ્યારે 2026માં આ આંકડો લગભગ 45 સુધી સીમિત રહ્યો છે. અનેક બ્રાન્ડ્સ લીગમાંથી બહાર નીકળી રહ્યા છે, જે તેની કમર્શિયલ વેલ્યુ માટે ચિંતાજનક છે.
તેમ છતાં, ડિજિટલ પ્લેટફોર્મ પર IPLનો પ્રભાવ વધતો જોવા મળે છે. JioHotstar પર ટૂર્નામેન્ટે પ્રથમ સપ્તાહમાં 515 મિલિયન ડિજિટલ રીચ હાંસલ કરી હતી અને કુલ વોચ ટાઇમ 32.6 બિલિયન મિનિટ સુધી પહોંચ્યો હતો. આથી સ્પષ્ટ થાય છે કે દર્શકોનો વલણ ટીવીથી ડિજિટલ તરફ ખસી રહ્યો છે.
વિશેષજ્ઞોના મત મુજબ, મેચોમાં વધતા 200+ સ્કોર, ફ્લેટ પિચ અને ઇમ્પેક્ટ પ્લેયર જેવા નિયમોએ રમતમાં બેટિંગનો જોર વધાર્યો છે, જેના કારણે બેટ-બોલનો સંતુલન બગડ્યો છે. ઉપરાંત સ્ટેડિયમમાં ઘટતી હાજરી, ધીમો ઓવર-રેટ અને લાંબા ચાલતા મેચો પણ દર્શકોને દૂર કરી રહ્યા છે.
આ પરિસ્થિતિ IPL માટે ચેતવણી સમાન છે. જો સમયસર ફેરફાર નહીં કરવામાં આવે, તો વિશ્વની સૌથી લોકપ્રિય ક્રિકેટ લીગનું ભવિષ્ય ખરેખર જોખમમાં પડી શકે છે.