ભારતીય ક્રિકેટર અને પૂર્વ ભારતીય ઓલરાઉન્ડર સંજય બાંગરની પુત્રી અનાયા બાંગર ફરી એકવાર ચર્ચામાં છે. ક્રિકેટ ઓસ્ટ્રેલિયાએ તેને મહિલા ક્રિકેટમાં વાપસીનો રસ્તો આપ્યા બાદ તેના સમાવેશને લઈને ક્રિકેટ જગતમાં ચર્ચા શરૂ થઈ છે. કેટલાક ખેલાડીઓએ તેના માટે અસહમતિ વ્યક્ત કરી છે, ત્યારે અનાયાએ ટીકાકારોને પહેલા આ મુદ્દા વિશે યોગ્ય માહિતી મેળવવાની સલાહ આપી છે.
દક્ષિણ આફ્રિકાની અનુભવી ક્રિકેટર મેરિઝાન કેપે અનાયાના મહિલા ક્રિકેટમાં પ્રવેશ અંગે સોશિયલ મીડિયા પર સવાલ ઉઠાવ્યા હતા અને ક્રિકેટ ઓસ્ટ્રેલિયાના નિર્ણયને ‘અત્યંત હાસ્યાસ્પદ’ ગણાવ્યો હતો. કેપના આ નિવેદન બાદ અનાયાએ પોતાનો પક્ષ સ્પષ્ટ કરતાં કહ્યું કે જે લોકો આ નિર્ણયનો વિરોધ કરવા માગે છે, તેણે ટ્રાન્સજેન્ડર ખેલાડીઓ માટેના નિયમો અને પાત્રતાના માપદંડ વિશે પહેલાં શિક્ષિત થવું જોઈએ.
અનાયાએ જણાવ્યું કે તેણે ક્રિકેટ ઓસ્ટ્રેલિયા દ્વારા નક્કી કરાયેલા નિયમોનું પાલન કર્યું છે અને પોતાની તરફથી જરૂરી માહિતી પણ આપી છે. તેણે ‘અન્યાયી ફાયદા’ના આરોપોને નકારી કાઢતાં કહ્યું કે તેની પાત્રતા અંગે નિર્ણય નિયમો અને જરૂરી માપદંડોના આધારે લેવામાં આવ્યો છે.
ક્રિકેટ ઓસ્ટ્રેલિયાએ અનાયાને મહિલા કોમ્યુનિટી ક્રિકેટ રમવાની મંજૂરી આપી છે. એલિટ મહિલા ક્રિકેટ અને વુમન્સ બિગ બેશ લીગમાં રમવા માટે તેને સંસ્થાની ટેસ્ટોસ્ટેરોન સંબંધિત શરતો પૂરી કરવી પડશે. જો તે જરૂરી માપદંડો પૂર્ણ કરે છે, તો માર્ચ 2027થી એલિટ ક્રિકેટમાં રમવાનો રસ્તો ખુલ્લો થઈ શકે છે. જોકે મંજૂરી મળવી એટલે ટીમમાં સીધી પસંદગી નહીં—અનાયાએ મેદાન પર પોતાના પ્રદર્શનથી સ્થાન મેળવવું પડશે.
અનાયાની ક્રિકેટમાં વાપસીનો માર્ગ સરળ રહ્યો નથી. તેણે જણાવ્યું કે ટ્રાન્ઝિશન દરમિયાન તેનો પ્રવાસ ખૂબ જ મુશ્કેલ અને એકલવાયો રહ્યો હતો. માર્ચ 2026માં તેણે જેન્ડર-અફર્મિંગ સર્જરી કરાવી હતી. હવે તે ઓસ્ટ્રેલિયામાં ક્લબ ક્રિકેટ રમવાની તૈયારી કરી રહી છે અને સારા પ્રદર્શનના આધારે ભવિષ્યમાં WBBLમાં સ્થાન મેળવવાનું સપનું જોઈ રહી છે.
આ સમગ્ર મામલાએ ક્રિકેટમાં ટ્રાન્સજેન્ડર ખેલાડીઓની ભાગીદારી, પાત્રતા અને રમતની સમાનતા અંગેની ચર્ચાને ફરી તેજ બનાવી છે.
🚨 MARIZANNE KAPP SPEAKS OUT 🇿🇦
South Africa all-rounder Marizanne Kapp has questioned Anaya Bangar’s inclusion in women’s cricket, calling the decision “ridiculous.”
A strong statement that’s already sparking debate. 👀🏏 pic.twitter.com/LH74iDHG2B
— ViratKoisa Sports (@ViratKoisa18) August 28, 2026