ઈંગ્લેન્ડ પ્રવાસ બાદ ટીમ ઈન્ડિયાના કોચિંગ સ્ટાફમાં મોટા ફેરફારો થવાની શક્યતા વ્યક્ત કરવામાં આવી રહી છે. મીડિયા રિપોર્ટ્સ અનુસાર મુખ્ય કોચ ગૌતમ ગંભીરના સપોર્ટ સ્ટાફનો એક સભ્ય ટીમથી અલગ થવાનો વિચાર કરી રહ્યો છે. તેની પાછળ IPLની કોઈ ફ્રેન્ચાઈઝી સાથે જોડાવાની સંભાવના અથવા કોચિંગ સ્ટાફના અન્ય સભ્યો સાથે મતભેદ જેવા કારણો હોવાનું માનવામાં આવી રહ્યું છે. જોકે, BCCI તરફથી હજુ સુધી કોઈ સત્તાવાર જાહેરાત કરવામાં આવી નથી.
રિપોર્ટ્સ મુજબ ટીમ ઈન્ડિયાના ફાસ્ટ બોલિંગ કોચ મોર્ને મોર્કેલ પોતાના પદ પરથી હટી શકે છે. મોર્કેલે વર્ષ 2024માં બાંગ્લાદેશ સામેની ઘરઆંગણે રમાયેલી શ્રેણીથી પોતાના કાર્યકાળની શરૂઆત કરી હતી અને છેલ્લા લગભગ બે વર્ષથી ભારતીય ટીમ સાથે જોડાયેલા છે. જો તેઓ પદ છોડે છે તો તેમના સ્થાને ત્રણ ભારતીય દિગ્ગજોના નામ સૌથી આગળ હોવાનું માનવામાં આવી રહ્યું છે.
આ યાદીમાં સૌથી પહેલું નામ ભારતના પૂર્વ સ્ટાર ફાસ્ટ બોલર ઝહીર ખાનનું છે. ઝહીરે આંતરરાષ્ટ્રીય ક્રિકેટમાં ભારતને અનેક યાદગાર જીત અપાવી છે. IPLમાં પણ તેઓ વિવિધ કોચિંગ અને મેનેજમેન્ટની ભૂમિકામાં રહી ચૂક્યા છે. જોકે, તેમને અત્યાર સુધી ભારતીય ટીમના બોલિંગ કોચ બનવાની તક મળી નથી.
બીજું નામ પૂર્વ ભારતીય ફાસ્ટ બોલર મુનાફ પટેલનું છે. મુનાફ છેલ્લા બે IPL સીઝનથી દિલ્હી કેપિટલ્સના બોલિંગ કોચ તરીકે કાર્યરત છે. તેમના માર્ગદર્શન હેઠળ ટીમના યુવા ઝડપી બોલરોએ શાનદાર પ્રદર્શન કર્યું હોવાથી તેઓ પણ મજબૂત દાવેદાર માનવામાં આવે છે.
ત્રીજું નામ લક્ષ્મીપતિ બાલાજીનું છે. બાલાજી IPLમાં કોલકાતા નાઇટ રાઇડર્સ અને ચેન્નાઈ સુપર કિંગ્સ જેવી ટીમો સાથે કોચિંગ સ્ટાફનો ભાગ રહી ચૂક્યા છે. હાલ પણ તેઓ CSK અકાદમી સાથે જોડાયેલા છે અને કોચિંગનો સમૃદ્ધ અનુભવ ધરાવે છે.
જો મોર્ને મોર્કેલ ખરેખર પદ છોડે છે તો ઝહીર ખાન, મુનાફ પટેલ અને લક્ષ્મીપતિ બાલાજીમાંથી કોઈ એકને ટીમ ઈન્ડિયાના નવા ફાસ્ટ બોલિંગ કોચ તરીકે તક મળી શકે છે. જોકે, અંતિમ નિર્ણય BCCIની સત્તાવાર જાહેરાત બાદ જ સ્પષ્ટ થશે.