ભારતીય ક્રિકેટ ટીમના યુવા ઓપનર અભિષેક શર્માએ પોતાના નામ, તસવીર અને ઓળખના અનધિકૃત ઉપયોગ સામે કડક પગલું ભર્યું છે. તેણે પોતાના ‘પર્સનાલિટી રાઇટ્સ’ એટલે કે વ્યક્તિત્વ સંબંધિત અધિકારોના રક્ષણ માટે દિલ્હી હાઈકોર્ટમાં અરજી દાખલ કરી છે. સોશિયલ મીડિયા અને વિવિધ ઓનલાઈન પ્લેટફોર્મ પર તેની ઓળખનો બિનઅધિકૃત રીતે ઉપયોગ કરવામાં આવી રહ્યો હોવાનો આરોપ તેણે લગાવ્યો છે.
સુનાવણી દરમિયાન દિલ્હી હાઈકોર્ટે આ મુદ્દાને ગંભીર ગણાવ્યો હતો. કોર્ટે અભિષેક શર્માના વકીલને કથિત વાંધાજનક પોસ્ટ્સ અને સામગ્રીના વધુ સ્ક્રીનશોટ્સ તથા પૂરાવા રજૂ કરવા જણાવ્યું છે. બીજી તરફ, મેટા (ફેસબુક અને ઇન્સ્ટાગ્રામની મૂળ કંપની) તરફથી પણ કોર્ટ સમક્ષ કેટલાક યુઆરએલ અને સંબંધિત વિગતો રજૂ કરવામાં આવી હતી. મામલાની આગામી સુનાવણીમાં આ તમામ પુરાવાઓના આધારે આગળની કાર્યવાહી કરવામાં આવશે.
અભિષેક શર્માનો દાવો છે કે તેની મંજૂરી વગર તેના નામ, તસવીર અને ઓળખનો ઉપયોગ કરીને કેટલીક ઓનલાઈન સામગ્રી તૈયાર કરવામાં આવી રહી છે. તેમાં ખાસ કરીને AI દ્વારા બનાવવામાં આવેલી તસવીરો અને અન્ય ડિજિટલ કન્ટેન્ટનો પણ સમાવેશ થાય છે. તેના મતે આવા કન્ટેન્ટથી તેની પ્રતિષ્ઠા અને જાહેર છબીને નુકસાન પહોંચી શકે છે.
સુનાવણી દરમિયાન હાઈકોર્ટે પણ નોંધ્યું કે ‘પર્સનાલિટી રાઇટ્સ’ અને ‘માનહાનિ’ વચ્ચે ખૂબ જ પાતળી રેખા છે અને આવા કેસોમાં બંને મુદ્દાઓને અલગ રીતે સમજવાની જરૂર છે. AI અને ડિજિટલ ટેક્નોલોજીના વધતા પ્રભાવને ધ્યાનમાં રાખીને આવા કેસો હવે વધુ મહત્વના બન્યા છે.
તાજેતરના સમયમાં અનેક સેલિબ્રિટીઓ પોતાના નામ અને તસવીરોના દુરુપયોગ સામે કોર્ટનો આશરો લઈ રહ્યા છે. અભિષેક શર્માનો આ કેસ પણ ડિજિટલ યુગમાં વ્યક્તિગત ઓળખ અને ગોપનીયતાના અધિકારોને લઈને એક મહત્વપૂર્ણ કાનૂની કેસ તરીકે જોવામાં આવી રહ્યો છે.
Cricketer Abhishek Sharma has moved the Delhi High Court seeking protection of his personality rights. The matter was listed today before Justice Jyoti Singh.
Read more: https://t.co/ILLcyzasUm pic.twitter.com/ZaNwMX6Fhe
— Live Law (@LiveLawIndia) July 7, 2026