ભારતીય ક્રિકેટર અભિષેક શર્માના વ્યક્તિત્વ અધિકારો (Personality Rights)ને લઈને દિલ્હી હાઈકોર્ટે મહત્વપૂર્ણ અંતરિમ આદેશ આપ્યો છે. કોર્ટે અભિષેક શર્માના નામ, તસવીર, અવાજ, ઓળખ અને તેમની છબિનો કોઈપણ વ્યક્તિ અથવા સંસ્થા તેની મંજૂરી વિના વ્યાવસાયિક કે વ્યક્તિગત લાભ માટે ઉપયોગ ન કરી શકે તેવો નિર્દેશ આપ્યો છે. આ નિર્ણય ખાસ કરીને સોશિયલ મીડિયા અને AI દ્વારા બનાવવામાં આવતા ડીપફેક (Deepfake) કન્ટેન્ટના વધતા દુરુપયોગને ધ્યાનમાં રાખીને લેવામાં આવ્યો છે.
અભિષેક શર્માએ દિલ્હી હાઈકોર્ટમાં અરજી કરીને દાવો કર્યો હતો કે સોશિયલ મીડિયા પ્લેટફોર્મ, કેટલીક વેબસાઇટ્સ અને ઓનલાઈન વેચાણકર્તાઓ તેની તસવીરો અને ઓળખનો ઉપયોગ કરીને ખોટી માહિતી ફેલાવી રહ્યા છે. ઉપરાંત, તેની મંજૂરી વિના તેના નામ અને ફોટાવાળી વસ્તુઓનું વેચાણ પણ કરવામાં આવી રહ્યું છે. AI ટેક્નોલોજીની મદદથી તેની તસવીરોમાં ફેરફાર કરીને ભ્રામક કન્ટેન્ટ પણ બનાવવામાં આવી રહ્યું હોવાનું અરજીમાં જણાવાયું હતું.
જસ્ટિસ જ્યોતિ સિંહે આપેલા અંતરિમ આદેશમાં મેટા સહિતના સોશિયલ મીડિયા પ્લેટફોર્મ અને ઈ-કોમર્સ વેબસાઇટ્સને આવા તમામ ભંગ કરતા લિંક્સ અને પોસ્ટ્સ દૂર કરવા માટે સૂચના આપી છે. કોર્ટે સ્પષ્ટ કર્યું કે કોઈપણ જાહેર વ્યક્તિની ઓળખનો અનધિકૃત ઉપયોગ તેના વ્યક્તિત્વ અધિકારોનું ઉલ્લંઘન ગણાશે અને તે કાયદેસર રીતે સ્વીકાર્ય નથી.
તાજેતરના સમયમાં AI આધારિત ડીપફેક વીડિયો અને તસવીરોના વધતા ઉપયોગને કારણે ખેલાડીઓ, ફિલ્મ સ્ટાર્સ અને અન્ય જાણીતી હસ્તીઓ માટે નવા પડકારો ઉભા થયા છે. અભિષેક શર્માના કેસમાં આવેલો આ નિર્ણય ભવિષ્યમાં આવા તમામ કેસો માટે એક મહત્વપૂર્ણ ન્યાયિક દાખલો બની શકે છે. કાનૂની નિષ્ણાતોનું માનવું છે કે આ નિર્ણય જાહેર હસ્તીઓના ડિજિટલ અધિકારોને વધુ મજબૂત બનાવશે અને તેની ઓળખના ગેરકાયદેસર ઉપયોગ પર અસરકારક નિયંત્રણ લાવવામાં મદદરૂપ થશે.
The Delhi High Court has granted interim protection to Indian cricketer Abhishek Sharma against the unauthorised use of his name, image and likeness, restraining social media accounts and online sellers from exploiting his personality through AI-generated content, deepfakes and…
— The Hindu (@the_hindu) July 14, 2026