ભારતીય ક્રિકેટના સૌથી સફળ કેપ્ટનોમાંના એક મહેન્દ્ર સિંહ ધોનીએ આજે પોતાનો 45મો જન્મદિવસ ઉજવ્યો. આ ખાસ અવસરે દેશ-વિદેશમાંથી ચાહકો, પૂર્વ ક્રિકેટરો અને અનેક જાણીતા લોકોએ તેને શુભેચ્છાઓ પાઠવી હતી. આ દરમિયાન તમિલનાડુના મુખ્યમંત્રી વિજયે પણ ધોની માટે એક ખાસ અને ભાવુક સંદેશ શેર કર્યો, જે સોશિયલ મીડિયા પર ઝડપથી વાયરલ થઈ ગયો છે.
મુખ્યમંત્રી વિજયે પોતાના સત્તાવાર સોશિયલ મીડિયા એકાઉન્ટ પર ધોની સાથેની એક તસવીર પોસ્ટ કરી હતી. તેમણે લખ્યું કે, “કેપ્ટન કૂલ મહેન્દ્ર સિંહ ધોનીને જન્મદિવસની હાર્દિક શુભેચ્છાઓ. તમારો અસાધારણ ક્રિકેટ વારસો, શાંત નેતૃત્વ અને વિનમ્ર સ્વભાવ અનેક પેઢીઓ માટે પ્રેરણાસ્ત્રોત છે. તને સારા સ્વાસ્થ્ય, સુખ અને સફળતાની શુભેચ્છાઓ. તમારા માટે ગૂંજતી સીટીઓનો અવાજ ક્યારેય ઓછો ન થાય.”
ધોની મૂળ ઝારખંડના હોવા છતાં તમિલનાડુમાં તેમની લોકપ્રિયતા અદભૂત છે. ઇન્ડિયન પ્રીમિયર લીગમાં ચેન્નાઈ સુપર કિંગ્સ (CSK)નું લાંબા સમય સુધી નેતૃત્વ કરવાના કારણે તેઓ ત્યાંના ચાહકો માટે માત્ર ક્રિકેટર નહીં પરંતુ “થાલા” તરીકે ઓળખાતા એક ભાવનાત્મક પ્રતીક બની ગયા છે. તેના દરેક મેચ દરમિયાન સ્ટેડિયમમાં ગૂંજતા ‘થાલા’ના નારા તેમની લોકપ્રિયતાનો પુરાવો આપે છે.
મુખ્યમંત્રી વિજયની પોસ્ટ પર થોડા જ સમયમાં હજારો લાઇક્સ અને સેંકડો કોમેન્ટ્સ આવી ગઈ હતી. ચાહકોએ ધોની પ્રત્યેનો પોતાનો પ્રેમ વ્યક્ત કરતાં તેને ભારતીય ક્રિકેટનો સૌથી શાંત અને સફળ કેપ્ટન ગણાવ્યો હતો. સોશિયલ મીડિયા પર ધોનીના જન્મદિવસને લઈને અનેક તસવીરો, વીડિયો અને શુભેચ્છા સંદેશાઓ પણ ટ્રેન્ડમાં રહ્યા.
ધોનીએ પોતાની કારકિર્દીમાં ભારતને 2007નો ટી20 વર્લ્ડ કપ, 2011નો વન-ડે વર્લ્ડ કપ અને 2013ની ચેમ્પિયન્સ ટ્રોફી જીતાડી હતી. આંતરરાષ્ટ્રીય ક્રિકેટમાંથી નિવૃત્તિ લીધા બાદ પણ તેની લોકપ્રિયતા અને ચાહકોનો પ્રેમ આજે પણ યથાવત્ છે, જેના વધુ એક ઉદાહરણ તરીકે તેમના 45મા જન્મદિવસે મળેલી આ વિશેષ શુભેચ્છા ચર્ચાનો વિષય બની છે.
Tamilnadu CM Vijay’s X [Twitter] Post for MS Dhoni on his Birthday.❤️ pic.twitter.com/h0E3DkSa4Q
— Maina Singh (@Maina_Singhx77) July 7, 2026