IPL 2026ની ફાઇનલમાં ગુજરાત ટાઇટન્સને રોયલ ચેલેન્જર્સ બેંગલુરુ સામે નિરાશાજનક હારનો સામનો કરવો પડ્યો. અમદાવાદના નરેન્દ્ર મોદી સ્ટેડિયમમાં રમાયેલી આ મેચ દરમિયાન ગુજરાત ટાઇટન્સના હેડ કોચ આશિષ નેહરા અને ટીમ મેનેજમેન્ટનો એક નિર્ણય ભારે ચર્ચાનો વિષય બન્યો. કેપ્ટન શુભમન ગિલ વહેલા આઉટ થયા બાદ તમામને આશા હતી કે સ્ટાર બેટ્સમેન જોશ બટલર ક્રિઝ પર આવશે, પરંતુ ટીમે તેના સ્થાને યુવા ખેલાડી નિશાંત સિંધુને નંબર-3 પર મોકલવાનો નિર્ણય કર્યો.
આ નિર્ણય પર કોમેન્ટ્રી કરી રહેલા દક્ષિણ આફ્રિકાના દિગ્ગજ અને RCBના પૂર્વ સ્ટાર ખેલાડી AB de Villiersએ ખુલ્લેઆમ અસંતોષ વ્યક્ત કર્યો. ડી વિલિયર્સે કહ્યું કે ટીમ કદાચ નવા બોલ સામે જોશ બટલરને બચાવવા માંગતી હતી અને બેટિંગ લાઇનઅપને વધુ ઊંડી બતાવવાનો પ્રયાસ કરી રહી હતી, પરંતુ આ એક “ડિફેન્સિવ” અભિગમ હતો જે તેને પસંદ આવ્યો નહીં.
નિશાંત સિંધુ પણ ટીમની અપેક્ષા મુજબ મોટી ઇનિંગ્સ રમી શક્યા નહીં અને 18 બોલમાં માત્ર 20 રન બનાવીને આઉટ થઈ ગયા. બીજી તરફ જોશ બટલર મોડા ક્રમે બેટિંગ કરવા આવ્યા, જેના કારણે ગુજરાત ટાઇટન્સ શરૂઆતના દબાણમાંથી ઝડપથી બહાર આવી શકી નહીં.
મેચ બાદ ક્રિકેટ જગતમાં આ નિર્ણયને લઈને ભારે ચર્ચા શરૂ થઈ ગઈ છે. ઘણા નિષ્ણાતોનું માનવું છે કે ફાઇનલ જેવી મોટી મેચમાં ટીમે પોતાના સૌથી અનુભવી અને આક્રમક બેટ્સમેન પર વિશ્વાસ મૂકવો જોઈએ હતો. AB ડી વિલિયર્સની ટિપ્પણી બાદ આશિષ નેહરાની આ રણનીતિ હવે IPL 2026ની સૌથી ચર્ચિત વ્યૂહાત્મક ભૂલોમાંથી એક માનવામાં આવી રહી છે.