ભારતીય ક્રિકેટ ટીમ હવે ODI World Cup 2027ની તૈયારીઓ તરફ આગળ વધી રહી છે. ભલે વિશ્વ કપમાં હજુ એક વર્ષથી વધુ સમય બાકી હોય, પરંતુ BCCIએ અત્યારથી જ લાંબા ગાળાની યોજના બનાવવાની શરૂઆત કરી દીધી છે. આગામી મહિને ભારત અને અફઘાનિસ્તાન વચ્ચે રમાનારી ટેસ્ટ અને વનડે સિરીઝ માટે આજે ટીમ ઈન્ડિયાની જાહેરાત થઈ શકે છે.
અહેવાલો મુજબ ચીફ સિલેક્ટર અજીત અગરકરની અધ્યક્ષતામાં મહત્વપૂર્ણ બેઠક યોજાશે, જેમાં માત્ર અફઘાનિસ્તાન સિરીઝ માટેની ટીમ જ નહીં, પરંતુ 2027 વર્લ્ડ કપને ધ્યાનમાં રાખીને કોર ગ્રુપ પર પણ ચર્ચા થશે. સૌથી વધુ નજર રોહિત શર્મા અને વિરાટ કોહલીના ભવિષ્ય પર રહેશે.
સૂત્રો અનુસાર વિરાટ કોહલીનું સ્થાન હાલમાં લગભગ નિશ્ચિત માનવામાં આવે છે, કારણ કે તેની બેટિંગ સતત મજબૂત રહી છે. જોકે રોહિત શર્માની ફિટનેસ અને સતત રમવાની ક્ષમતાને લઈને ચર્ચા થઈ શકે છે. BCCI પહેલેથી જ સ્પષ્ટ કરી ચૂકી છે કે ફિટનેસ સ્ટાન્ડર્ડમાં કોઈ સમજૂતી નહીં કરવામાં આવે.
આ બેઠકમાં રવિન્દ્ર જાડેજા અને હાર્દિક પંડ્યાની ભૂમિકા પર પણ ચર્ચા થવાની છે. ખાસ કરીને હાર્દિક પંડ્યા ODIમાં સતત 10 ઓવર બોલિંગ કરી શકશે કે નહીં, તે સિલેક્ટર્સ માટે મોટો પ્રશ્ન છે. આ કારણસર યુવા ઓલરાઉન્ડર નીતિશ કુમાર રેડ્ડીને તક આપવાનો વિચાર પણ ચાલી રહ્યો હોવાનું કહેવાય છે.
ભારત અને અફઘાનિસ્તાન વચ્ચે પહેલા એક ટેસ્ટ મેચ રમાશે, ત્યારબાદ ત્રણ વનડે મેચોની સિરીઝ યોજાશે. માનવામાં આવી રહ્યું છે કે આ સિરીઝ માટે પસંદ થનારા ખેલાડીઓમાંથી જ 2027 વર્લ્ડ કપ માટેનો મુખ્ય કોર ગ્રુપ તૈયાર થવાની શરૂઆત થશે. હવે સૌની નજર BCCIની જાહેરાત અને પસંદગી સમિતિના અંતિમ નિર્ણય પર છે.