ઇંગ્લેન્ડ સામે ચોથી ટી-20 મેચમાં ટીમ ઈન્ડિયાને 9 વિકેટે કારમી હારનો સામનો કરવો પડ્યો હતો. આ હાર સાથે ભારતે શ્રેણી પણ ગુમાવી દીધી, જેના કારણે દેશભરના ક્રિકેટ ચાહકોમાં ભારે નિરાશા જોવા મળી રહી છે. આ દરમિયાન કોંગ્રેસ સાંસદ અને જાણીતા ક્રિકેટપ્રેમી શશિ થરૂરે પણ સોશિયલ મીડિયા પર પોતાની તીખી પ્રતિક્રિયા વ્યક્ત કરી છે.
શશિ થરૂરે ટીમ ઈન્ડિયાના પ્રદર્શનને લઈને નિરાશા વ્યક્ત કરતાં કહ્યું કે હવે સતત મળતી હાર અને શરમજનક પ્રદર્શનથી તેઓ “દંગ” અને “સ્તબ્ધ” થઈ ગયા છે. તેણે લખ્યું કે ટીમનું આ પ્રકારનું પ્રદર્શન સ્વીકાર્ય નથી અને હવે જવાબદારી નક્કી કરવાનો સમય આવી ગયો છે. તેની પોસ્ટ સોશિયલ મીડિયા પર ઝડપથી વાયરલ થઈ રહી છે અને ક્રિકેટ ચાહકો પણ તેના પર વિવિધ પ્રકારની પ્રતિક્રિયાઓ આપી રહ્યા છે.
બ્રિસ્ટોલમાં રમાયેલી આ મેચમાં ભારતે પ્રથમ બેટિંગ કરતાં 20 ઓવરમાં 7 વિકેટે 158 રન બનાવ્યા હતા. ભારતીય કેપ્ટન શ્રેયસ અય્યરે શાનદાર 80 રનની ઇનિંગ્સ રમી હતી, પરંતુ અન્ય બેટ્સમેનો ખાસ યોગદાન આપી શક્યા નહોતા. જવાબમાં ઇંગ્લેન્ડે હેરી બ્રૂક અને ફિલ સોલ્ટની વિસ્ફોટક બેટિંગના જોરે માત્ર એક વિકેટ ગુમાવીને લક્ષ્યાંક સરળતાથી હાંસલ કરી લીધો અને ઐતિહાસિક શ્રેણી વિજય નોંધાવ્યો.
હાર બાદ ભારતીય ટીમના પ્રદર્શન પર અનેક પૂર્વ ક્રિકેટરો અને નિષ્ણાતોએ પણ સવાલો ઉઠાવ્યા છે. ખાસ કરીને બેટિંગ અને બોલિંગ બંને વિભાગમાં ટીમ સતત નિષ્ફળ રહી હોવાની ચર્ચા થઈ રહી છે. મુખ્ય કોચ ગૌતમ ગંભીર અને પસંદગી સમિતિ પર પણ હવે દબાણ વધતું જોવા મળી રહ્યું છે.
હવે ભારત માટે આગામી ટી-20 મેચ માત્ર સાંત્વના જીત મેળવવાનો મોકો નહીં, પરંતુ આત્મવિશ્વાસ પાછો મેળવવાની પણ મોટી તક હશે. ટીમ ઈન્ડિયા કેવી રીતે વાપસી કરે છે તેના પર હવે સમગ્ર ક્રિકેટ જગતની નજર રહેશે.
इंग्लैंड के खिलाफ भारत की टी20 सीरीज में शर्मनाक हार के बाद कांग्रेस सांसद शशि थरूर का गुस्सा फूट पड़ा। उन्होंने सोशल मीडिया पर इस हार को बर्दाश्त से बाहर बताया।#INDvENG #t20 #ShashiTharoor #teamindia pic.twitter.com/7iV1ApFEdv
— NavBharat Live (@TheNavbharatliv) July 10, 2026